شہریوں کو غیر قانونی حراست میں رکھنے پر 3 پولیس افسران ملازمت سے برطرف

اسلام آباد کے ڈپٹی انسپکٹر جنرل (ڈی آئی جی) پولیس علی وسیم نے اختیارات کے ناجائز استعمال اور ایک شہری کو اس کے والد سمیت غیر قانونی طور پر حراست میں رکھنے کے جرم میں تین پولیس افسران کو ملازمت سے برطرف کر دیا ہے۔ ڈی آئی جی اسلام آباد کے مطابق شہریوں کو حبسِ بیجا میں رکھنے کے واقعے پر باقاعدہ محکمانہ انکوائری قائم کی گئی تھی، جس میں متعلقہ اہلکاروں پر عائد الزامات مکمل طور پر ثابت ہو گئے۔

انکوائری رپورٹ کے دوران تمام نامزد اہلکار خود کو بے گناہ ثابت کرنے میں ناکام رہے۔ برطرف کیے جانے والے پولیس افسران میں سب انسپکٹر محمد عظیم، کانسٹیبل محمد بلال اور کانسٹیبل سعد امتیاز شامل ہیں۔ ڈی آئی جی علی وسیم نے واضح کیا کہ انکوائری رپورٹ کی حتمی سفارشات کی روشنی میں کارروائی کرتے ہوئے تینوں افسران کو فوری طور پر عہدوں سے برطرف کر کے محکمانہ عمل مکمل کر دیا گیا ہے۔