فرانس میں طلبا کا پرتشدد احتجاج، درجنوں سکول بند، پولیس سے جھڑپیں، کئی طالبعلم زخمی

فرانس میں تعلیمی سہولیات کے ابتر حالات کے خلاف طلبا کا احتجاج شدت اختیار کر گیا ہے، جس کے باعث پیرس سمیت مختلف شہروں میں پرتشدد ہنگامے پھوٹ پڑے اور درجنوں سکول اور تعلیمی ادارے بند کر دیے گئے۔ مظاہرین کو منتشر کرنے کے لیے پولیس کی جانب سے شدید آنسو گیس کا استعمال کیا گیا، جبکہ فریقین کے درمیان ہونے والی پرتشدد جھڑپوں کے نتیجے میں متعدد طلبہ زخمی ہو گئے ہیں۔ پولیس نے کارروائی کرتے ہوئے فرانس بھر سے تقریباً دو ہزار مظاہرین کو حراست میں لے لیا ہے۔

فرانسیسی طلبہ کا یہ احتجاج کلاس رومز میں حد سے زیادہ گنجائش، اساتذہ کی شدید کمی، سکولوں کی خستہ حال عمارتوں اور تعلیمی شعبے کے لیے ناکافی فنڈنگ کے خلاف جاری ہے۔ مظاہرین کا مطالبات کی منظوری تک احتجاج جاری رکھنے کا عزم ہے، جبکہ ملک بھر کے تعلیمی نظام میں اس ہڑتال اور ہنگاموں کے باعث شدید بحران پیدا ہو گیا ہے۔