یہودی کمیونٹی کو نشانہ بنانے کی سازش کا الزام، برطانیہ میں 2 ایرانی شہریوں پر فرد جرم عائد

برطانیہ میں یہودی کمیونٹی کے خلاف دہشت گردی کی ایک بڑی سازش کو ناکام بناتے ہوئے دو ایرانی شہریوں پر باضابطہ فردِ جرم عائد کر دی گئی ہے۔ برطانوی انسدادِ دہشت گردی پولیس کے مطابق گرفتار ملزمان—رحمان صالحی اور سلام احمدیان—شمالی انگلینڈ میں یہودیوں کے مقدس تہوار “یومِ کپور” کی شام کمیونٹی پر حملے کی تیاری کر رہے تھے۔ ملزمان مبینہ طور پر ایران میں مقیم ایک تیسرے فریق کے ساتھ مسلسل رابطے میں تھے۔

برطانوی کاؤنٹر ٹیررزم پولیس کے سینئر کوآرڈینیٹر نے بتایا کہ گزشتہ ہفتے مانچسٹر میں یہودی برادری پر حملے کی منصوبہ بندی کی اطلاع ملتے ہی بروقت کارروائی کر کے اس سازش کو ناکام بنایا گیا۔ حکام کا کہنا ہے کہ ملزمان پر عائد الزامات انتہائی سنگین نوعیت کے ہیں اور معاملے کی مزید تحقیقات جاری ہیں تاکہ تمام سہولت کاروں اور مرکزی کرداروں کا سراغ لگایا جا سکے۔