خیبر پختونخوا میں گورنر راج اور ایمرجنسی کیلئے مکمل تیار ہیں: فیصل کریم کنڈی

گورنر خیبر پختونخوا فیصل کریم کنڈی نے کہا ہے کہ خیبر پختونخوا میں گورنر راج اور ایمرجنسی کے نفاذ کے لیے آئینی طریقہ کار کے تحت مکمل تیاری موجود ہے۔ سابق صوبائی وزیر سید اختر حسین شاہ کی وفات پر ان کے اہل خانہ سے تعزیت کے بعد میڈیا سے گفتگو کرتے ہوئے گورنر کے پی نے پاکستان تحریکِ انصاف (پی ٹی آئی) کو چیلنج دیا کہ وہ لانگ مارچ کر کے دکھائے اور صوابی انٹرچینج کراس کر کے اسلام آباد کی طرف بڑھے۔

فیصل کریم کنڈی نے پی ٹی آئی قیادت کے حالیہ بیانات کو صوبے میں انتشار پھیلانے کی کوشش قرار دیتے ہوئے واضح کیا کہ تحریکِ انصاف کے ساتھ نہ تو کوئی ڈھیل ہو رہی ہے اور نہ ہی کوئی ڈیل کی جا رہی ہے۔ انہوں نے نئے صوبوں کے قیام کی حمایت کرتے ہوئے کہا کہ وہ صوبہ ہزارہ سمیت ملک بھر میں انتظامی بنیادوں پر نئے صوبے بنانے کے حق میں ہیں، کیونکہ پارلیمنٹ کے ذریعے نئے صوبوں کا قیام وقت کی اہم ضرورت ہے۔