مذاکرات کے پیش نظر پارلیمنٹ ہاؤس میں سکیورٹی کے سخت انتظامات

حکومت اور اپوزیشن کے درمیان سیاسی تناؤ میں کمی اور اہم امور پر گفتگو کے لیے مذاکرات کے دوسرے دور کا انعقاد ہفتے کو ہوگا۔ ترجمان قومی اسمبلی کے باضابطہ بیان کے مطابق دونوں فریقین کے درمیان یہ اہم ملاقات دوپہر 2 بجے سپیکر قومی اسمبلی کے چیمبر میں منعقد ہوگی۔

مذاکراتی عمل کے پیشِ نظر پارلیمنٹ ہاؤس میں سیکیورٹی اور انتظامی امور کو انتہائی سخت اور مؤثر بنایا گیا ہے۔ ترجمان نے بتایا کہ اجلاس کی میڈیا کوریج کے لیے خاص ضوابط طے کیے گئے ہیں، جن کے تحت کیمرہ مینز پبلک انٹری گیٹ کے ذریعے داخل ہو کر گیٹ نمبر ایک پر قائم میڈیا سینٹر تک محدود رہیں گے، جبکہ پارلیمنٹ کے اندر جانے کی اجازت صرف ان صحافیوں کو ہوگی جن کے پاس قومی اسمبلی کی پریس گیلری کے باقاعدہ کارڈز موجود ہوں گے۔