کاؤنٹر ٹیررازم ڈیپارٹمنٹ کے دائرہ اختیار میں اضافہ

صوبائی کابینہ کی منظوری کے بعد کاؤنٹر ٹیررازم ڈیپارٹمنٹ (سی ٹی ڈی) کے دائرہ اختیار میں توسیع کر دی گئی ہے۔ اس فیصلے کے تحت تحصیل کوہِ سلیمان، ڈیرہ غازی خان کو باضابطہ طور پر سی ٹی ڈی کے دائرہ اختیار میں شامل کر لیا گیا ہے۔

اسی طرح تحصیل ڈی ایکسکلوڈڈ ایریا راجن پور کو بھی سی ٹی ڈی ڈیرہ غازی خان کے دائرہ اختیار میں شامل کر دیا گیا ہے۔ اس توسیع کے بعد سی ٹی ڈی ڈیرہ غازی خان کا دائرہ اختیار اب ڈی جی خان پولیس ریجن کے تمام اضلاع تک پھیل گیا ہے۔ڈی جی خان پولیس ریجن میں ڈیرہ غازی خان، مظفرگڑھ، لیہ اور راجن پور شامل ہیں۔ حکام کے مطابق یہ اقدام خطے میں انسداد دہشت گردی اور امن و امان کی صورتحال کو مزید مؤثر بنانے کے لیے اٹھایا گیا ہے۔حالیہ فیصلے کے تحت 27 ستمبر 2019 کو جاری کیے گئے سابقہ نوٹیفکیشن میں باضابطہ ترمیم کر دی گئی ہے۔ محکمہ داخلہ کی سفارش اور صوبائی کابینہ کی منظوری کے بعد اس حوالے سے نیا نوٹیفکیشن بھی جاری کر دیا گیا ہے۔ذرائع کے مطابق دائرہ اختیار میں توسیع سے سی ٹی ڈی کو حساس علاقوں میں مؤثر کارروائیوں اور بہتر انٹیلی جنس بنیادوں پر اقدامات میں مدد ملے گی۔