سہیل آفریدی نے نئی ہائبرڈ بسوں، پنک بس سروس اور بی آر ٹی ڈپو کی سولرائزیشن کا افتتاح کر دیا

وزیراعلیٰ خیبر پختونخوا محمد سہیل آفریدی نے پشاور بی آر ٹی کے حوالے سے اہم اقدامات کا افتتاح کرتے ہوئے 52 نئی ہائبرڈ بسوں، خواتین کے لیے خصوصی ‘پنک بس سروس’، چمکنی ڈپو کی سولرائزیشن اور مال آف حیات آباد ڈپو کے پروجیکٹس کا باضابطہ آغاز کر دیا ہے۔ تقریب کے دوران بریفنگ میں بتایا گیا کہ پشاور بی آر ٹی روزانہ ڈھائی لاکھ سے زائد مسافروں کو معیاری سفری سہولیات فراہم کر رہی ہے، جن میں 30 فیصد خواتین شامل ہیں۔ اس کے علاوہ بی آر ٹی نیٹ ورک کے ذریعے ماحول دوست اقدامات کے نتیجے میں سالانہ 30 ہزار ٹن کاربن ڈائی آکسائیڈ کے اخراج میں کمی واقع ہو رہی ہے۔

بریفنگ کے مطابق، بی آر ٹی فلیٹ میں 52 نئی بسوں کی شمولیت کے بعد بسوں کی کل تعداد 296 ہو گئی ہے، جس سے مسافروں کے رش کو کم کرنے اور نئے روٹس کھولنے میں مدد ملے گی۔ چمکنی ڈپو میں 1 میگاواٹ کا سولر سسٹم مکمل کر لیا گیا ہے جو سالانہ 14 لاکھ 40 ہزار یونٹس بجلی پیدا کرے گا، جس سے صوبائی خزانے کو سالانہ 7 کروڑ 60 لاکھ روپے کی بچت ہو گی۔ انہوں نے بتایا کہ 1.5 ارب روپے کی لاگت سے بی آر ٹی کے تمام تر نظام کی سولرائزیشن کا منصوبہ بھی زیرِ عمل ہے۔ مزید برآں، 6.2 ارب روپے کی لاگت سے مزید 50 بسوں اور نئے ڈپو کی تعمیر جاری ہے، جبکہ رواں اے ڈی پی میں 5 ارب روپے کی لاگت سے مزید 50 بسیں شامل کی گئی ہیں۔ حکام نے واضح کیا کہ پاکستان میں اس وقت مکمل الیکٹرک اور جدید ہائبرڈ بس سروس فراہم کرنے کا اعزاز پشاور بی آر ٹی نے حاصل کر لیا ہے۔