افغانستان میں دہشت گردوں کے خلاف فضائی کارروائی، 22 ہلاک، ٹھکانے تباہ

وزارتِ اطلاعات و نشریات نے بتایا ہے کہ پاکستان کی سکیورٹی فورسز نے افغانستان میں موجود دہشت گردوں کے محفوظ ٹھکانوں پر کامیاب اور انتہائی درست فضائی کارروائی کرتے ہوئے 22 دہشت گردوں کو جہنم واصل کر دیا ہے۔ ترجمان کے مطابق کارروائی میں دو مختلف مقامات پر ‘فتنۃ الخوارج’ اور ‘فتنۃ الہندوستان’ سے تعلق رکھنے والے دہشت گردوں کی پناہ گاہوں کو نشانہ بنایا گیا، جس کے نتیجے میں وہاں موجود بھاری مقدار میں اسلحہ، بارود اور عسکری سامان مکمل طور پر تباہ ہو گیا۔

وزارتِ اطلاعات کی جانب سے جاری بیان میں واضح کیا گیا کہ یہ کارروائی مصدقہ انٹیلی جنس معلومات کی روشنی میں کی گئی اور اس دوران شہری آبادی کے تحفظ اور عدمِ جانی نقصان کو سو فیصد یقینی بنایا گیا۔ بیان میں مزید بتایا گیا کہ ‘آپریشن غضب لِلحق’ اور ‘عزمِ استحکام’ کے وژن کے تحت افغانستان میں موجود دہشت گردوں اور غیر ملکی سرپرستی میں کام کرنے والے عناصر کے خلاف یہ کارروائیاں پوری رفتار سے جاری رہیں گی۔ پاکستان نے اس عزم کا اعادہ کیا ہے کہ شہریوں کی سلامتی اور تحفظ ریاست کی اولین ترجیح ہے اور افغانستان کی سرزمین سے پاکستان کے خلاف دہشت گردی کا استعمال کسی صورت برداشت نہیں کیا جائے گا