16 سال سے کم عمر بچوں کے سوشل میڈیا استعمال پر پابندی کا فی الحال کوئی قانون موجود نہیں: پی ٹی اے کا اسلام آباد ہائیکورٹ میں جواب

اسلام آباد ہائیکورٹ میں 16 سال سے کم عمر بچوں کے سوشل میڈیا استعمال پر پابندی سے متعلق کیس کی سماعت کے دوران پاکستان ٹیلی کمیونیکیشن اتھارٹی (پی ٹی اے) نے اپنا تفصیلی جواب عدالت میں جمع کرا دیا ہے۔ پی ٹی اے نے مؤقف اختیار کیا ہے کہ کم عمر بچوں کے سوشل میڈیا استعمال پر پابندی کا فی الحال کوئی قانون موجود نہیں ہے، اور اتھارٹی اپنے قانونی دائرہ کار سے تجاوز کر کے بچوں کی عمر کی تصدیق کا نظام قائم نہیں کر سکتی۔ جواب میں بتایا گیا کہ بچوں کو آن لائن خطرات سے بچانے کے لیے نیا قانونی اور پالیسی فریم ورک تشکیل دینا ضروری ہے، جبکہ پی ای سی اے ترمیم 2025 کے تحت ’سوشل میڈیا پروٹیکشن اینڈ ریگولیٹری اتھارٹی‘ کا قیام بھی جلد عمل میں لایا جا رہا ہے۔ پی ٹی اے نے عدالت کو آگاہ کیا کہ اب تک 17 لاکھ 89 ہزار سے زائد غیر قانونی لنکس کا جائزہ لے کر 15 لاکھ 77 ہزار سے زائد یو آر ایلز (88.20 فیصد) بلاک کیے جا چکے ہیں، جن میں اخلاق باختہ، اسلام مخالف اور ملکی سلامتی کے خلاف مواد شامل ہے۔ پی ٹی اے نے یہ بھی انکشاف کیا کہ سوشل میڈیا کمپنیاں پاکستان میں رجسٹرڈ نہ ہونے اور مقامی قوانین کی پابند نہ ہونے کی وجہ سے تکنیکی رکاوٹیں پیدا کر رہی ہیں، اس لیے عدالت سے استدعا کی گئی ہے کہ پی ٹی اے کے قانونی دائرہ کار سے باہر مانگے گئے ریلیف کی حد تک درخواست خارج کی جائے۔ واضح رہے کہ اس کیس میں وزارتِ اطلاعات، وزارتِ داخلہ اور نیشنل کمیشن آن رائٹس آف چائلڈ نے بھی اپنے جوابات جمع کرا دیے ہیں۔