حکومت بزرگ شہریوں کی فلاح وبہبود کیلئے اقدامات کر رہی ہے: مریم نواز

وزیراعلیٰ پنجاب مریم نواز شریف نے بزرگ افراد کے عالمی دن کے موقع پر اپنے پیغام میں بزرگ شہریوں کو زبردست خراجِ تحسین پیش کرتے ہوئے ان کی صحت اور سلامتی کے لیے نیک خواہشات کا اظہار کیا ہے۔ انہوں نے کہا کہ بزرگ ہمارے ماضی کا عکس اور روشن مستقبل کے لیے ایک سبق ہیں، جنہوں نے اپنی جوانی کی توانائیاں اور قربانیاں دے کر ہمارے آج کو ممکن بنایا ہے۔ مریم نواز شریف کا مزید کہنا تھا کہ حکومت بزرگ شہریوں کی فلاح و بہبود کے لیے عملی اقدامات کر رہی ہے، جس کے تحت اولڈ ہومز کو مزید بہتر بنایا جا رہا ہے، اولڈ ہوم میں مقیم بزرگوں کو حج کی سعادت بھی حاصل ہوئی ہے، جبکہ پنجاب حکومت کی جانب سے الیکٹرک بسوں میں بزرگ شہریوں کو مفت سفر کی سہولت بھی فراہم کی جا رہی ہے۔ آخر میں انہوں نے نوجوانوں سے اپیل کی کہ وہ اپنے بزرگوں کا احترام اور بھرپور خدمت کریں۔