خانیوال میں بیٹھے پاکستانی نوجوان نے امریکی ڈاکخانے کو 126 ملین ڈالر کا چونا لگا دیا

خانیوال سے تعلق رکھنے والے 33 سالہ نوجوان فہیم اکرم نے امریکی محکمہ ڈاک کو 12 کروڑ 60 لاکھ ڈالر (تقریباً 38 ارب پاکستانی روپے) کا عظیم الشان مالیاتی نقصان پہنچا کر خانیوال کی تاریخ کا سب سے بڑا پوسٹل فراڈ بے نقاب کر دیا ہے۔ امریکی ریاست فلوریڈا کی فیڈرل عدالت نے 28 ستمبر کو اس تاریخی کیس کا فیصلہ سناتے ہوئے ملزم کی ویب سائٹ فوری طور پر بند کرنے کا حکم جاری کیا اور اس کی غیر موجودگی میں اس پر امریکہ کے ساتھ دھوکہ دہی، جعلی ڈاک ٹکٹ بنانے اور وائر فراڈ (Wire Fraud) کی سنگین دفعات کے تحت باضابطہ فردِ جرم عائد کر دی ہے۔

امریکی محکمہ انصاف کی جانب سے جاری کردہ تفصیلا ت کے مطابق ملزم فہیم اکرم نے ‘LabelsBank.com’ نامی ایک ویب سائٹ قائم کر رکھی تھی جس کے ذریعے جعلی امریکی پوسٹل شپنگ لیبلز اور ٹکٹ فروخت کیے جاتے تھے۔ ملزم وزن یا سائز کی قید کے بغیر ہر پارسل کا جعلی شپنگ ٹکٹ محض 2 ڈالر میں فراہم کرتا تھا، جس کے باعث دنیا بھر سے 5,200 سے زائد صارفین نے اس ویب سائٹ سے 51 لاکھ سے زائد جعلی شپنگ لیبلز خریدے۔ چونکہ ملزم اس وقت پاکستان میں موجود ہے، اس لیے امریکی عدالت نے اس کی غیر موجودگی میں ہی قانونی کارروائی مکمل کرتے ہوئے فردِ جرم عائد کی ہے۔