معاشی ترقی میں سرمایہ کاروں کی شراکت ڈھائی سال میں دوگنا سے زائد بڑھ چکی ہے: وزیر خزانہ

وفاقی وزیر خزانہ سینیٹر محمد اورنگزیب نے پاکستان اسٹاک ایکسچینج میں تقریب سے خطاب کرتے ہوئے کہا ہے کہ ملک میں معاشی ترقی کے لیے مالیاتی استحکام بنیادی ضرورت تھا، اور اب میکرو اکنامک استحکام کو پائیدار بناتے ہوئے ‘بوم اینڈ بسٹ’ سائیکل کو ختم کرنا ہوگا۔ انہوں نے انکشاف کیا کہ ڈھائی سال میں ملکی معاشی ترقی میں سرمایہ کاروں کی شراکت دوگنا سے زائد ہو چکی ہے، جبکہ گزشتہ 12 ماہ کے دوران اسٹاک مارکیٹ میں ‘جین زی’ اور ملینیئلز کی 85 فیصد شراکت ریکارڈ کی گئی ہے۔ وزیر خزانہ نے بتایا کہ 29 مارچ 2024 کو جب وہ پہلی بار پی ایس ایکس آئے تھے تو 100 انڈیکس 67 ہزار پوائنٹس پر تھا جو اب بڑھ کر ایک لاکھ 70 ہزار تک پہنچ چکا ہے، اور گزشتہ 20 سال کے مقابلے میں سب سے زیادہ 11 آئی پی اوز گزشتہ سال ہوئے۔ انہوں نے وزیراعظم اپنا گھر پروگرام کا ذکر کرتے ہوئے بتایا کہ اس سلسلے میں 60 ارب روپے جاری کیے جا چکے ہیں جبکہ بینکنگ انڈسٹری نے 340 ارب روپے کی منظوری دی ہے۔ محمد اورنگزیب نے مزید کہا کہ پہلی بار ڈسکوز کی نجکاری میں ترک سرمایہ کاروں نے دلچسپی ظاہر کی ہے، حکومت کا بنیادی کام نجی شعبے کو کاروباری ماحول فراہم کرنا ہے، اور اب ہمیں روایتی سوچ سے نکل کر ‘نئی معیشت 2.0’ میں قدم رکھنا ہوگا۔