وفاقی آئینی عدالت کے رولز جاری، اہم قانونی معاملات کی وضاحت

وفاقی آئینی عدالت کے 126 صفحات پر مشتمل جامع رولز جاری کر دیے گئے ہیں، جن میں توہین عدالت، نظرثانی درخواستوں، سزائے موت، التوا، آرٹیکل 63A کے تحت اپیلوں، زبانی دلائل، بینچوں کی تشکیل اور وکلا سے متعلق باضابطہ قواعد وضع کیے گئے ہیں۔ نئے رولز کے مطابق وفاقی آئینی عدالت کو توہین عدالت کا ازخود نوٹس لینے اور کسی بھی شخص کی درخواست پر کارروائی کرنے کا اختیار ہوگا، جبکہ بے بنیاد یا بدنیتی پر مبنی نظرثانی درخواست یا التوا پر کم از کم 25 ہزار روپے تک کے اخراجات عائد کیے جا سکیں گے اور سماعت سے قبل 50 ہزار روپے زر ضمانت جمع کرانا ہوگا۔ ضابطے کے تحت سزائے موت کی نظرثانی درخواست دائر ہونے پر فیصلے تک پھانسی پر عملدرآمد خودکار طور پر معطل رہے گا۔ اس کے علاوہ ہر مقدمے میں فریقین کے لیے زبانی دلائل کی مدت عام طور پر 10 منٹ (اہم قانونی سوال پر 30 منٹ) مقرر کی گئی ہے، ہر مقدمہ کم از کم دو ججز کا بینچ سنے گا، اور آرٹیکل 63A کے تحت الیکشن کمیشن کے فیصلوں کے خلاف اپیلیں 30 دن کے اندر دائر ہو کر 90 روز میں نمٹائی جائیں گی۔