کراچی: زیر تعمیر پل کی شٹرنگ اچانک گر گئی، ایک شخص جاں بحق

کراچی کے علاقے گلشن اقبال میں بیت المکرم مسجد کے قریب ریڈ لائن منصوبے کے زیر تعمیر پل کی شٹرنگ اچانک زمین بوس ہونے سے ایک شخص جاں بحق ہوگیا۔ ترجمان ریسکیو 1122 کے مطابق اطلاع ملتے ہی امدادی ٹیمیں موقع پر پہنچ گئیں اور ملبے تلے دبے افراد کی تلاش کے لیے ریسکیو اور سرچ آپریشن شروع کیا۔ حادثے میں جان کی بازی ہارنے والا شخص موقع پر ڈیوٹی انجام دینے والا سکیورٹی گارڈ تھا۔ پولیس کا کہنا ہے کہ ملبے تلے مزید افراد کے دبے ہونے کے خدشے کے پیش نظر امدادی سرگرمیاں تیز کر دی گئی ہیں، جبکہ حادثے کی اصل وجوہات کا تعین کرنے کے لیے بھی تحقیقات کا آغاز کر دیا گیا ہے۔