ایف پی سی سی آئی کا انکم ٹیکس ریٹرن جمع کرانے کی آخری تاریخ میں ایک ماہ کی توسیع کا مطالبہ

فیڈریشن آف پاکستان چیمبرز آف کامرس اینڈ انڈسٹری (FPCCI) نے انکم ٹیکس ریٹرن جمع کرانے کی آخری تاریخ میں ایک ماہ کی توسیع کرنے کا پرزور مطالبہ کرتے ہوئے حکومت سے اپیل کی ہے کہ ریٹرن جمع کرانے کی نئی آخری تاریخ 31 اکتوبر 2026 مقرر کی جائے۔

ایف پی سی سی آئی کے صدر عاطف اکرام شیخ نے اپنے ایک بیان میں کہا ہے کہ 30 ستمبر کی موجودہ ڈیڈ لائن میں توسیع سے ملک بھر کے ٹیکس دہندگان کو ریٹرنز جمع کرانے میں انتہائی ضروری سہولت میسر آئے گی۔ انہوں نے فیڈرل بورڈ آف ریوینیو (FBR) کے ’آئرس‘ (IRIS) پورٹل کی سست روی اور تکنیکی خرابیوں پر شدید تشویش کا اظہار کرتے ہوئے کہا کہ ڈیجیٹل سسٹم کی بار بار خرابی اور سست روی کے باعث فائلنگ کے عمل میں بڑی رکاوٹیں پیدا ہو رہی ہیں، اور ان تکنیکی کمزوریوں کی سزا معصوم ٹیکس دہندگان کو دینا ہرگز مناسب نہیں۔

عاطف اکرام شیخ نے واضح کیا کہ تاجر برادری ملکی ٹیکس قوانین کی مکمل پاسداری اور قومی خزانے میں اپنا بھرپور حصہ ڈالنے کے لیے پُرعزم ہے، تاہم حالیہ ٹیکس قوانین میں موجود پیچیدگیوں، بڑھتی ہوئی مہنگائی اور کاروباری اخراجات میں اضافے نے خصوصاً چھوٹے اور متوسط طبقات (SMEs) کی انتظامی مشکلات میں اضافہ کر دیا ہے، جس کے باعث درست معلومات کی فراہمی کے لیے اضافی وقت درکار ہے۔

انہوں نے خبردار کیا کہ اگر ڈیڈ لائن میں توسیع نہ کی گئی تو متعدد جائز اور قانون پسند کاروباری ادارے بھی مجبوری کے تحت ’نان فائلر‘ کے زمرے میں چلے جائیں گے، جس سے نہ صرف کاروباری سرگرمیوں میں خلل پڑے گا بلکہ غیر ضروری جرمانوں کا بھی سامنا کرنا پڑے گا۔

صدر ایف پی سی سی آئی نے وزیراعظم پاکستان، وزیر خزانہ و محصولات اور چیئرمین ایف بی آر سے پرزور مطالبہ کیا ہے کہ وہ زمینی حقائق کا فوری نوٹس لیں اور ایک ماہ کی توسیع کی منظوری دیں تاکہ ایکٹو ٹیکس فائلرز کی تعداد میں اضافہ ہو سکے اور بہتر ٹیکس کمپلائنس کو یقینی بنایا جا سکے۔ آخر میں انہوں نے ایف بی آر کے ساتھ مل کر ٹیکس نظام کو مزید آسان اور مؤثر بنانے کے عزم کا بھی اعادہ کیا۔