سکیورٹی فورسز کی قلات کے قریب کارروائی، 5 دہشتگرد ہلاک، 23 مغوی بازیاب

پاک فوج کے شعبہ تعلقاتِ عامہ (آئی ایس پی آر) کے مطابق سیکیورٹی فورسز نے بلوچستان کے ضلع قلات کے قریب این-25 (N-25) شاہراہ پر ایک کامیاب آپریشن کرتے ہوئے 5 خطرناک دہشت گردوں کو ہلاک کر دیا ہے۔ آئی ایس پی آر نے بتایا کہ دہشت گردوں کی جانب سے قومی شاہراہ پر چیک پوسٹ قائم کر کے عوام کی آمدورفت میں خلل ڈالنے، گاڑیاں چھیننے اور بھتہ خوری کی کوشش کو سیکیورٹی فورسز نے بروقت اور مؤثر کارروائی کر کے ناکام بنا دیا۔

آئی ایس پی آر کے مطابق اس دلیرانہ آپریشن کے دوران فورسز نے دہشت گردوں کے ٹھکانے سے 23 مغوی شہریوں کو بحفاظت بازیاب کروا لیا ہے۔ اس کے علاوہ دہشت گردوں کے قبضے سے 6 ٹرک، 3 بسیں اور 2 کاریں برآمد کی گئیں جبکہ بھاری مقدار میں اسلحہ، گولہ بارود اور دھماکا خیز مواد بھی تحویل میں لے لیا گیا ہے۔ آئی ایس پی آر نے عزم کا اعادہ کیا ہے کہ ملک میں امن و امان کی صورتِ حال کو خراب کرنے اور عوام کی زندگیوں کو خطرے میں ڈالنے والے عناصر کا بلا تفریق مکمل خاتمہ کیا جائے گا۔