آصف زرداری کا بیرونِ ملک دورہ نجی، اخراجات خود برداشت کئے: ایوانِ صدر کی وضاحت

ایوانِ صدر نے صدر مملکت آصف علی زرداری کے حالیہ بیرونِ ملک دورے سے متعلق ذرائع ابلاغ میں گردش کرنے والی رپورٹس پر باقاعدہ وضاحت جاری کر دی ہے۔ ترجمان ایوانِ صدر کے مطابق صدرِ مملکت کا یہ دورہ مکمل طور پر نجی نوعیت کا تھا، جس کے تمام تر اخراجات انہوں نے اپنی ذاتی جیب سے برداشت کیے ہیں اور قومی خزانے پر اس کا کوئی بوجھ نہیں ڈالا گیا۔

ایوانِ صدر کے اعلامیے میں واضح کیا گیا ہے کہ صدر آصف علی زرداری نے اس سفر کے لیے ذاتی طور پر طیارہ چارٹر کیا تھا۔ طیارے کے کرائے، عملے کی ادائیگیوں، ائیرپورٹ پارکنگ، وہاں قیام اور دیگر تمام متعلقہ اخراجات کی ادائیگی صدرِ مملکت نے اپنی ذاتی حیثیت میں کی ہے۔ ایوانِ صدر نے میڈیا رپورٹس کے تناظر میں تمام تر قیاس آرائیوں کو رد کرتے ہوئے اعادہ کیا ہے کہ اس نجی دورے کے دوران سرکاری خزانے سے ایک روپیہ بھی خرچ نہیں کیا گیا۔