پاکستانی طلباکیلئے بڑی خوشخبری، روس نے اسکالرشپ کی تعداد بڑھا دی۔

کراچی: پاکستانی نوجوانوں اور طلبہ کے لیے خوشخبری ہے کہ روس نے پاکستان کے لیے سرکاری فنڈڈ اسکالرشپس کی تعداد میں نمایاں اضافہ کر دیا ہے۔ روس کے مطابق مختلف شعبہ جات میں اعلیٰ تعلیم کے لیے دستیاب اسکالرشپس کی تعداد تین گنا بڑھا دی گئی ہے۔

یہ اعلان کراچی میں واقع روس کے فرینڈشپ ہاؤس میں منعقدہ میڈیا بریفنگ کے دوران کیا گیا۔ ڈائریکٹر روس سینٹر فار سائنس اینڈ کلچر رسلان پروخوروف نے بتایا کہ روسی جامعات میں پاکستانی طلبہ کی دلچسپی اور داخلوں میں واضح اضافہ دیکھنے میں آیا ہے، جس کے پیش نظر پاکستان کے لیے اسکالرشپس کی تعداد بڑھانے کا فیصلہ کیا گیا ہے۔

انہوں نے بتایا کہ یہ سرکاری فنڈڈ اسکالرشپس مختلف تعلیمی شعبوں میں اعلیٰ تعلیم کے لیے فراہم کی جا رہی ہیں اور ان کے لیے درخواستیں 15 جنوری تک جمع کرائی جا سکتی ہیں۔ روسی حکام کے مطابق روسی جامعات میں داخلے کے خواہشمند پاکستانی طلبہ کے لیے روسی زبان سیکھنے کے مفت کورسز کا بھی اعلان کیا گیا ہے تاکہ طلبہ کو تعلیم کے دوران سہولت فراہم کی جا سکے۔

روس دوستی مرکز کے مطابق روسی جامعات میں فراہم کی جانے والی اسکالرشپس بالکل مفت ہیں اور ان کے لیے رجسٹریشن کا طریقہ کار صرف آن لائن ہے۔ حکام نے واضح کیا کہ اسکالرشپس یا داخلوں کے لیے کسی بھی قسم کے ایجنٹ کی ضرورت نہیں ہے اور طلبہ کسی بھی دلال یا غیر متعلقہ فرد سے ہوشیار رہیں۔

روسی حکام نے پاکستانی طلبہ کو دعوت دی کہ وہ اس موقع سے فائدہ اٹھاتے ہوئے روس کی معیاری جامعات میں اعلیٰ تعلیم حاصل کریں اور دونوں ممالک کے درمیان تعلیمی و ثقافتی روابط کو مزید مضبوط بنائیں۔