نئے صوبوں کے قیام پر سیاسی جماعتوں کا ڈائیلاگ لازمی، بلدیاتی نظام مضبوط کیا جائے: حمزہ شہباز

لاہور: پاکستان مسلم لیگ (ن) کے سینئر رہنما اور سابق وزیراعلیٰ پنجاب حمزہ شہباز نے کہا ہے کہ نئے صوبوں کے حساس معاملے پر تمام سیاسی جماعتوں کے درمیان باقاعدہ ڈائیلاگ کا انعقاد وقت کی اہم ضرورت ہے، اور اس معاملے کا ملبہ اسٹیبلشمنٹ پر نہیں ڈالا جا سکتا۔

صحافتی تنظیم ‘پیما’ (PEMA) کے ایک وفد سے گفتگو کرتے ہوئے حمزہ شہباز نے کہا کہ اگر سیاسی جماعتیں ماضی میں بروقت اور بااختیار بلدیاتی انتخابات کروا لیتیں تو آج نئے صوبوں کے قیام کی نوبت ہی نہ آتی۔ انہوں نے زور دیا کہ ایک کمزور بلدیاتی نظام عوام کے مسائل کا حل فراہم نہیں کر سکتا، لہٰذا آئین میں ضروری ترمیم کر کے قومی و صوبائی اسمبلیوں کے عام انتخابات کے ساتھ ہی بلدیاتی الیکشن بھی کروانے کا پابند بنایا جانا چاہیے۔

سابق وزیراعلیٰ پنجاب نے بیوروکریسی کے رویے پر تنقید کرتے ہوئے کہا کہ بیوروکریسی نے ہمیشہ حکومت اور عوام کے درمیان دوریاں پیدا کی ہیں۔ انہوں نے واضح کیا کہ محض وزیراعظم یا وزیراعلیٰ آفس میں بیٹھ کر عوامی مسائل حل نہیں کیے جا سکتے، بلکہ رہنماؤں کو عوام کے درمیان جانا پڑے گا، اور وہ خود عوامی مسائل کے حل کے لیے ہر ممکن حد تک جائیں گے۔