امریکہ: غیر ملکی سرکار کے ملازمین کے بچوں کے لیے گرین کارڈ کے قواعد میں بڑی تبدیلی

واشنگٹن: امریکی ہوم لینڈ سیکیورٹی (DHS) نے عبوری قواعد جاری کرتے ہوئے امریکہ میں غیر ملکی سرکاری ملازمین کے ہاں پیدا ہونے والے بچوں کو مستقل رہائش (گرین کارڈ) حاصل کرنے کی اجازت دینے سے متعلق ضوابط میں اہم ترمیمی نوٹیفکیشن جاری کیا ہے۔

نئے قاعدے کے تحت سابقہ اصطلاح ”غیر ملکی سفارت کار“ (Foreign Diplomatic Officer) کو وسیع تر کرتے ہوئے ”غیر ملکی سرکاری ملازم“ (Foreign Government Employee) سے بدل دیا گیا ہے۔ صدر ڈونلڈ ٹرمپ کے باضابطہ ایگزیکٹو آرڈر 14418 کی روشنی میں جاری کردہ ان جدید ضوابط کے مطابق، ایسے تمام امریکی پیداائشی بچے جن کے والدین میں سے کوئی ایک بھی امریکی شہری نہ ہو لیکن پیدائش کے وقت وہ کسی غیر ملکی حکومت، سفارت خانے، قونصل خانے، یا بین الاقوامی خودمختار تنظیم کا تسلیم شدہ ملازم ہو، وہ قانونی مستقل رہائشی (LPR) کے طور پر رجسٹر ہو سکتے ہیں۔ تاہم، ان قواعد میں ذاتی ملازمین، تھرڈ کنٹری کے شہریوں اور نجی دورے پر آئے سرکاری ملازمین کو مستثنیٰ رکھا گیا ہے۔

ڈی ایچ ایس کی جانب سے اس نئے قانون کی روشنی میں فارم I-485 اور بائیو گرافک فارم G-325R میں بھی ضروری ترامیم کی جا رہی ہیں۔ یہ عبوری قاعدہ 4 ستمبر 2026ء سے نافذ العمل تصور کیا جائے گا۔ تاہم، امریکی ڈسٹرکٹ کورٹ میں زیرِ سماعت کیس (Casa Inc. v. Trump) کے حکم امتناعی (Injunction) کی وجہ سے، جب تک حکومت کو عدالت سے ریلیف نہیں مل جاتا، ان قواعد کی عملداری مخصوص کلاس پر عارضی طور پر معطل رہے گی۔