امریکا کو سمجھنا ہوگا کہ دباؤ سے سفارتکاری بحال نہیں ہوسکتی: عباس عراقچی

تہران: ایرانی وزیرِ خارجہ سید عباس عراقچی نے کہا ہے کہ امریکہ کے ساتھ سفارتی تعلقات اور مذاکرات کے راستے پر واپسی ناممکن نہیں ہے، تاہم واشنگٹن انتظامیہ کو یہ سمجھنا ہو گا کہ زور و زبردستی اور دباؤ کے ذریعے کوئی پیش رفت حاصل نہیں کی جا سکتی۔

سماجی رابطے کی ویب سائٹ (X) پر جاری کردہ اپنے ایک اہم بیان میں عباس عراقچی نے بتایا کہ تہران میں قطری وزیراعظم و وزیرِ خارجہ شیخ محمد بن عبدالرحمان الثانی کے ساتھ ان کی انتہائی مثبت اور تعمیری بات چیت ہوئی ہے۔ انہوں نے واضح کیا کہ سفارتی عمل کی مؤثر بحالی کے لیے امریکہ کو بنیادی اعتماد سازی، باہمی احترام پر مبنی مکالمے، ایران کے قانونی و بین الاقوامی حقوق کی تسلیم اور اپنے سابقہ معاہداں اور وعدوں کی پاسداری کا ثبوت دینا ہو گا۔

ایرانی وزیرِ خارجہ کا کہنا تھا کہ خطے میں تناؤ کو کم کرنے اور سفارت کاری کو دوبارہ درست سمت پر لانے کے لیے امریکہ کو یکطرفہ معاشی و سیاسی دباؤ کا راستہ چھوڑ کر احترام اور باہمی اعتماد کی بنیاد پر آگے بڑھنا ہو گا۔ انہوں نے زور دیا کہ ایران کسی بھی صورت دباؤ کے تحت مذاکرات کی میز پر نہیں آئے گا۔