ایشین گیمز 2026ء: شرکاء کی تعداد 17 ہزار تک پہنچ گئی، منتظمین کو رہائش کے بحران کا سامنا

ٹوکیو: جاپان میں رواں سال منعقد ہونے والی ایشین گیمز 2026ء میں شرکاء کی تعداد مقررہ حد سے تجاوز کر جانے کے باعث منتظمین کو رہائش اور بجٹ کے سخت مسائل کا سامنا کرنا پڑ رہا ہے۔

میڈیا رپورٹس کے مطابق ایشین گیمز میں کھلاڑیوں اور آفیشلز کی متوقع تعداد 15 ہزار سے بڑھ کر 17 ہزار تک پہنچ گئی ہے۔ جاپانی گیمز حکام نے واضح کیا ہے کہ اضافی 2 ہزار شرکاء کے لیے ناگویا اور دیگر میزبان شہروں میں نہ تو اضافی بجٹ موجود ہے اور نہ ہی رہائشی گنجائش، جس کے باعث اضافی افراد کو اپنی رہائش کا انتظام خود کرنے کی ہدایت کی گئی ہے۔ منتظمین نے اولمپک کونسل آف ایشیاء (OCA) سے بھی شرکاء کی تعداد کم کرنے کی درخواست کی ہے۔

رہائشی بحران سے نمٹنے کے لیے جاپانی حکام مختلف متبادل ذرائع استعمال کر رہے ہیں۔ رپورٹس کے مطابق تقریباً 4 سے 5 ہزار کھلاڑیوں کو کروز شپس (Cruise Ships) میں ٹھہرایا جائے گا، جبکہ 2 ہزار کے قریب کھلاڑیوں اور آفیشلز کے لیے کنٹینر طرز کی عارضی رہائش گاہیں تیار کی جا رہی ہیں، کیونکہ اس بار روایتی ایتھلیٹس ولیج قائم نہیں کیا گیا۔ دیگر شرکاء کو ہوٹلوں اور ٹوکیو کی مختلف عمارتوں میں ٹھہرانے کا منصوبہ ہے۔

واضح رہے کہ رواں سال مارچ میں ٹیک بال (Teqball) اور پیڈل (Padel) کے کھیل ایشین گیمز کے پروگرام میں شامل کیے گئے تھے، جس کے بعد شرکاء کا حجم بڑھ گیا۔ 2026ء کی ایشین گیمز 19 ستمبر سے 4 اکتوبر تک ناگویا اور صوبہ آچی (Aichi) میں منعقد ہوں گی، جس میں مجموعی طور پر 11 ہزار کھلاڑی اور 6 ہزار حکام کی شرکت متوقع ہے۔