خیبر پختونخوا کے مزید 32 سرکاری ہسپتال نجی شعبے کے حوالے کرنے کا فیصلہ

خیبر پختونخوا حکومت نے صوبے میں صحت کی سہولیات کو بہتر بنانے اور کم کارکردگی کا مظاہرہ کرنے والے مزید 32 سرکاری ہسپتالوں کو نجی شعبے کے حوالے (آؤٹ سورس) کرنے کا فیصلہ کر لیا ہے، جس کی تیاریاں مکمل کر لی گئی ہیں۔ حکام کے مطابق آؤٹ سورس کیے جانے والے اداروں میں 21 کیٹگری ڈی ہسپتال، 5 رورل ہیلتھ سینٹرز (آر ایچ سی) اور 6 کیٹگری بی ہسپتال شامل ہیں۔ ان ہسپتالوں کی موجودہ صورتحال اور انتظامی امور کی جانچ کے لیے تھرڈ پارٹی آڈٹ جاری ہے، جبکہ نجی اداروں کا انتظام سنبھالنے سے قبل ان کی مالی حیثیت اور صلاحیت کو بھی پرکھا جائے گا۔ تحویل میں لینے والے اداروں پر ماہر ڈاکٹرز اور ایمرجنسی سہولیات کی فراہمی لازمی ہوگی جبکہ حکومت سہ ماہی بنیادوں پر بجٹ مہیا کرے گی۔ اس فیصلے کے بعد صوبے میں نجی انتظام کے تحت چلنے والے سرکاری ہسپتالوں کی کل تعداد 50 ہو جائے گی۔