سانحہ پمز کی تحقیقات کیلئے جوڈیشل کمیشن تشکیل دینے کی درخواست دائر

اسلام آباد میں پاکستان انسٹیٹیوٹ آف میڈیکل سائنسز (پمز) میں 26 اگست کو پیش آنے والے اندوہناک واقعے کی آزادانہ تحقیقات کے لیے اسلام آباد ہائیکورٹ میں جوڈیشل کمیشن تشکیل دینے کی درخواست دائر کر دی گئی ہے۔ ایڈووکیٹ قاسم اقبال جلالی کی جانب سے دائر کی گئی اس درخواست میں استدعا کی گئی ہے کہ ہائیکورٹ کے جج یا سیشن جج ویسٹ پر مشتمل جوڈیشل کمیشن قائم کیا جائے، واقعے کی سائنسی بنیادوں پر فرانزک تحقیقات کرائی جائیں اور ہسپتال کے تمام فائر الارم سسٹم کا مکمل آڈٹ کرنے کا حکم دیا جائے۔ درخواست گزار نے حکومت کی جانب سے قائم کردہ فیکٹ فائنڈنگ کمیٹی پر شدید عدم اعتماد کا اظہار کرتے ہوئے مؤقف اختیار کیا کہ ڈائریکٹر جنرل ایمرجنسی جیسے افسران مفادات کے واضح ٹکراؤ کی وجہ سے خود شفاف تفتیش کا حصہ نہیں بن سکتے۔ اس آئینی درخواست میں وفاق، سیکرٹری داخلہ، سیکرٹری صحت، چیف کمشنر اور آئی جی اسلام آباد کو فریق بنایا گیا ہے