نائن الیون کے ماسٹر مائنڈ خالد شیخ کے خلاف مقدمہ جون 2028 میں شروع ہوگا

امریکہ میں 11 ستمبر 2001 کے دہشت گردانہ حملوں کے مبینہ ماسٹر مائنڈ خالد شیخ محمد اور ان کے دیگر ساتھیوں کے خلاف مقدمے کی باقاعدہ سماعت جون 2028 میں امریکی فوجی عدالت میں شروع کی جائے گی۔ امریکی میڈیا کی رپورٹس کے مطابق فوجی جج نے کیس کے ٹرائل کی حتمی تاریخ کا اعلان کر دیا ہے۔ القاعدہ کے بانی اسامہ بن لادن کے انتہائی اہم اور قریبی ساتھی سمجھے جانے والے خالد شیخ محمد کو مارچ 2003 میں پاکستان سے گرفتار کیا گیا تھا، جس کے بعد وہ تین سال تک سی آئی اے کی خفیہ تحویل میں رہے اور بعد ازاں 2006 میں انہیں کیوبا کی گوانتانامو بے جیل منتقل کر دیا گیا جہاں وہ تا حال قید ہیں۔ نائن الیون حملوں میں ستمبر 2001 کے دوران تقریباً تین ہزار افراد ہلاک ہوئے تھے، جس کے نتیجے میں امریکہ نے افغانستان پر حملہ کر کے طالبان کی حکومت کا خاتمہ کر دیا تھا جبکہ اسامہ بن لادن کو مئی 2011 میں ایبٹ آباد میں ایک امریکی آپریشن کے دوران ہلاک کیا گیا تھا۔