محسن نقوی سے ملائیشین ہم منصب کی ملاقات، انسدادِ دہشت گردی کے خلاف تعاون بڑھانے پر اتفاق

اسلام آباد میں وفاقی وزیرِ داخلہ محسن نقوی اور ملائیشیا کے وزیرِ داخلہ سیف الدین ناسوتیون بن اسماعیل کے درمیان وفود کی سطح پر اہم مذاکرات ہوئے، جس میں دونوں ممالک نے انسدادِ دہشت گردی، منشیات کنٹرول، انسانی اسملنگ کی روک تھام اور سائبر کرائم سے نمٹنے کے لیے انٹیلی جنس شیئرنگ اور مشترکہ اقدامات پر اتفاق کیا۔ ان مذاکراتی کوششوں کو عملی جامہ پہنانے اور ادارہ جاتی رابطہ کاری کو مؤثر بنانے کے لیے دونوں ممالک نے ایک ‘جوائنٹ ورکنگ گروپ’ (Joint Working Group) قائم کرنے کا فیصلہ کیا ہے۔

اجلاس میں پاکستان کی نیشنل پولیس اکیڈمی اور رائل ملائیشین پولیس کالج کے درمیان پیشہ ورانہ تبادلوں اور مشترکہ تربیتی پروگراموں کو فروغ دینے کا عزم ظاہر کیا گیا، جبکہ پاکستان نے ملائیشیا کے کوسٹ گارڈز کی مہارت اور تجربات سے فائدے کے لیے دلچسپی کا اظہار کیا۔ وزیرِ داخلہ محسن نقوی نے ملائیشیا کو ایک تیزی سے ترقی کرتی مسلم معیشت قرار دیتے ہوئے باہمی سیاحت، عوامی روابط، اور ویزا سہولیات کو مزید آسان بنانے پر زور دیا تاکہ دوطرفہ تعلقات کو معاشی و نچلی سطح پر مستحکم کیا جا سکے۔