قتل کے مقدمے میں دیت کی رقم کے تعین کا معاملہ، سپریم کورٹ نے فیصلہ محفوظ کرلیا

سپریم کورٹ آف پاکستان نے قتل کے مقدمے میں دیت کی رقم کے تعیین کے طریقہ کار اور شرح سے متعلق ایک اہم کیس کی سماعت مکمل کرتے ہوئے فیصلہ محفوظ کر لیا ہے۔ عدالتِ عظمیٰ نے قرار دیا کہ قانون و انصاف کے تقاضوں کے تحت دیت کے تعیین کے لیے بنیادی قانونی سوالات کا تفصیلی جائزہ لینا انتہائی ضروری ہے۔ جسٹس ہاشم کاکڑ کی سربراہی میں تین رکنی بینچ نے مجرم ندیم خان کی اپیل پر سماعت کی، جس کے وکیل نے موقف اختیار کیا کہ مجرم اپنی قید کی بنیادی سزا پوری کر چکا ہے لیکن صرف دیت کی رقم ادا نہ کر پانے کی وجہ سے مسلسل جیل میں قید کاٹ رہا ہے۔ دورانِ سماعت پراسیکیوٹر کے پی ارشد حسین نے عدالت کو بتایا کہ دیت کے تعین کے لیے موجودہ دور کی شرح کے مطابق رقم قریباً 1 کروڑ 97 لاکھ روپے بنتی ہے۔