اسلامک یونیورسٹی کے تین نائب صدور کی تعیناتی اسلام آباد ہائیکورٹ میں چیلنج

انٹرنیشنل اسلامک یونیورسٹی اسلام آباد کے تین نائب صدور (نائب صدر/وائس پریذیڈنٹس) کی تعیناتی کے عمل کو اسلام آباد ہائیکورٹ میں چیلنج کر دیا گیا ہے، جس پر عدالتِ عالیہ نے یونیورسٹی انتظامیہ کو نوٹس جاری کرتے ہوئے دو ہفتوں کے اندر تفصیلی جواب طلب کر لیا ہے۔ شہری جاوید اختر کی جانب سے دائر کردہ درخواست پر جسٹس ایاز شوکت نے سماعت کی، جبکہ درخواست گزار کی طرف سے وکیل آکاش تارا اور وکیل ریحان الدین عدالت کے سامنے پیش ہوئے۔

سماعت کے دوران وکیل آکاش تارا نے مؤقف اختیار کیا کہ ہائیکورٹ کے سابقہ فیصلے کے مطابق اسلامی یونیورسٹی میں تمام اہم تعیناتیاں شفاف اور باقاعدہ اشتہار کے ذریعے اوپن میرٹ پر ہونی چاہیے تھیں، لیکن یونیورسٹی نے اس واضح عدالتی حکم کو نظر انداز کرتے ہوئے باہر کے اہل امیدواروں کو موقع دینے کی بجائے صرف اندرونی فیکلٹی ممبران میں سے من پسند تعینائیاں کر لیں۔ انہوں نے عدالت کو بتایا کہ یونیورسٹی انتظامیہ نے اپنا الگ غیر قانونی طریقہ کار بنا کر ان عہدوں کو پر کیا۔ دورانِ سماعت جسٹس ایاز شوکت نے ہدایت کی کہ جواب میں یہ بات بھی واضح طور پر سامنے لائی جائے کہ کیا بورڈ آف گورنرز نے اپنے قانونی اختیارات کسی کمیٹی کو تفویض کیے تھے یا نہیں۔ عدالت نے فریقین کے دلائل سننے کے بعد اسلامک یونیورسٹی کو نوٹس جاری کر کے دو ہفتوں میں جواب جمع کرانے کی ہدایت کے ساتھ سماعت ملتوی کر دی۔