ملتان میں کھیلے گئے نیشنل چیمپئنز کپ کے ایک اہم اور سنسنی خیز مقابلے میں پاکستان گرین نے بہترین آل راؤنڈ کارکردگی کا مظاہرہ کرتے ہوئے پاکستان گولڈ کو 128 رنز کے نمایاں مارجن سے شکست دے دی۔
پاکستان گرین کے 315 رنز کے پہاڑ جیسے ہدف کے تعاقب میں پاکستان گولڈ کی پوری ٹیم 42.1 اوورز میں صرف 186 رنز بنا کر پویلین لوٹ گئی۔ پاکستان گولڈ کی جانب سے شامل حسین 53 رنز بنا کر ٹاپ اسکورر رہے جبکہ باقی بیٹرز گرینز کے بولرز کا مقابلہ نہ کر سکے۔ پاکستان گرین کی طرف سے تیز گیند باز محمد حسنین نے 3 اور اسپنر مہران ممتاز نے 2 کھلاڑیوں کو آؤٹ کیا۔
اس سے قبل پاکستان گرین نے پہلے ٹاس جیت کر بیٹنگ کرتے ہوئے مقررہ اوورز میں 314 رنز کا بھاری مجموعہ ترتیب دیا۔ ٹیم کی جانب سے قومی اوپنر فخر زمان نے شاندار فارم جاری رکھتے ہوئے ایونٹ میں مسلسل دوسری سنچری (115 رنز) اسکور کی اور ٹاپ اسکورر رہے۔ عمیر بن یوسف نے 74 اور شاداب خان نے 61 رنز کی جارحانہ اننگز کھیل کر ٹیم کا اسکور 300 سے پار پہنچایا۔ پاکستان گولڈ کی طرف سے شاہین شاہ آفریدی اور عبدالسبحان نے 3، 3 وکٹیں حاصل کیں۔
