ناگا عوام بھی 14 اگست کو یومِ آزادی سمجھتے ہیں: ناگا خاتون

ریاست ناگالینڈ سے تعلق رکھنے والی ایک ناگا خاتون نے پاکستانی قوم کو 14 اگست کے یومِ آزادی کی مبارکباد دیتے ہوئے کہا ہے کہ ناگا عوام بھی 14 اگست کو ہی اپنا یومِ آزادی سمجھتے ہیں اور بھارتی حکمرانی کے خلاف اپنی سیاسی و قوم پرستانہ جدوجہد جاری رکھے ہوئے ہیں۔ کشمیر میڈیا سروس کے مطابق اپنے ایک ویڈیو پیغام میں انہوں نے دعویٰ کیا کہ ناگا قوم نے برطانوی راج کے انخلا کے وقت 14 اگست کو ہی اپنی آزادی کا اعلان کیا تھا، تاہم بعد میں بھارت نے ان کی سرزمین پر اپنا تسلط قائم کر لیا۔ انہوں نے ناگا قوم کی اس جدوجہد کا موازنہ کشمیریوں اور سکھوں کی حقوق و خودارادیت کی تحریکوں سے کرتے ہوئے عالمی برادری اور بالخصوص پاکستانی عوام سے اپیل کی کہ وہ ناگا عوام کے حقِ خودارادیت کی اخلاقی و سفارتی حمایت کریں۔

اپنے پیغام میں ناگا خاتون نے زور دے کر کہا کہ ناگا قوم اپنی منفرد تاریخ، ثقافت، زبان، جغرافیائی شناخت اور فوج رکھتی ہے، لہٰذا انہیں اپنے سیاسی مستقبل کا فیصلہ خود کرنے کا مکمل حق حاصل ہے۔ انہوں نے بھارتی حکمرانی پر سخت تنقید کرتے ہوئے بھارتی پرچم کو جابرانہ قبضے کی علامت قرار دیا اور ویڈیو کے دوران اسے نذرِ آتش کر کے اپنے احتجاج کا اظہار کیا۔ انہوں نے عزم ظاہر کیا کہ ناگا عوام اپنے بنیادی حقوق کے حصول اور خود مختار زندگی گزارنے کے لیے آزادی ملنے تک اپنی کوششیں اور جدوجہد بدستور جاری رکھیں گے۔