آزاد کشمیر الیکشن: باغ کے دو حلقوں کے 23 پولنگ سٹیشنوں پر ری پولنگ کا آغاز

آزاد کشمیر الیکشن کے تیسرے مرحلے میں ضلع باغ کے دو حلقوں کے 23 پولنگ سٹیشنوں پر ری پولنگ کا عمل شروع ہو گیا ہے۔ الیکشن کمیشن کے مطابق ان میں حلقہ ایل اے 15 (باغ 2) کے 9 جبکہ ایل اے 16 (باغ 3) کے 14 پولنگ سٹیشن شامل ہیں، جہاں بالترتیب 5 ہزار اور 7,004 ووٹرز اپنا حقِ رائے دہی استعمال کر رہے ہیں۔ پولنگ کا عمل سیکیورٹی کے سخت اور جامع انتظامات کے تحت صبح 8 بجے سے شام 5 بجے تک بلا تعطل جاری رہے گا۔ واضح رہے کہ 10 اگست کو انتخابی عملہ وقت پر نہ پہنچنے اور علاقے میں کشیدگی کے باعث ان پولنگ سٹیشنوں پر رائے دہی ملتوی کر دی گئی تھی، جس کے بعد اب دوبارہ پولنگ کا انعقاد کیا جا رہا ہے۔