نیشنل چیمپئنز کپ: پاکستان وائٹس نے پاکستان بلوز کو 6 رنز سے شکست دے دی

ملتان کرکٹ سٹیڈیم میں کھیلے گئے نیشنل چیمپئنز کپ کے اہم میچ میں پاکستان وائٹس نے سخت مقابلے کے بعد پاکستان بلوز کو 6 رنز سے شکست دے دی ہے۔ میچ میں پاکستان بلوز نے ٹاس جیت کر پاکستان وائٹس کو پہلے بیٹنگ کی دعوت دی۔ پاکستان وائٹس کی پوری ٹیم 49.3 اوورز میں 245 رنز بنا کر آؤٹ ہو گئی۔ وائٹس کی جانب سے اوپننگ بیٹر شاہ زیب خان نے شاندار بلے بازی کا مظاہرہ کرتے ہوئے 71 رنز بنائے جبکہ کپتان صائم ایوب 22 رنز بنا سکے۔ بلوز کی جانب سے محمد فائق نے 3 اور معاذ صداقت نے 2 وکٹیں حاصل کیں، جبکہ حسن علی، عاکف جاوید، عرفات منہاس اور سفیان مقیم نے ایک ایک کھلاڑی کو آؤٹ کیا۔

246 رنز کے ہدف کے تعاقب میں پاکستان بلوز کی ٹیم 49.4 اوورز میں 239 رنز بنا کر آل آؤٹ ہو گئی اور یوں اسے 6 رنز سے ناکامی کا سامنا کرنا پڑا۔ بلوز کی طرف سے معاذ صداقت نے 59 اور محمد فائق نے 54 رنز کی بہترین اننگز کھیلیں مگر اپنی ٹیم کو فتح نہ دلا سکے۔ پاکستان وائٹس کی فتح میں تیز گیند باز محمد وسیم جونیئر نے اہم ترین کردار ادا کیا جنہوں نے 5 وکٹیں حاصل کیں، جبکہ شاہ نواز دھانی نے 4 کھلاڑیوں کو آؤٹ کر کے ان کا بھرپور ساتھ دیا۔ ایونٹ کا چوتھا میچ پاکستان گولڈ اور پاکستان گرینز کے درمیان ملتان کرکٹ سٹیڈیم میں کھیلا جائے گا۔