الیکشن کمیشن کا پنجاب اور کنٹونمنٹس میں بلدیاتی انتخابات فوری کرانے کا فیصلہ

الیکشن کمیشن آف پاکستان نے چیف الیکشن کمشنر سکندر سلطان راجہ کی زیرِ صدارت اجلاس میں پنجاب اور کنٹونمنٹ بورڈز میں بلدیاتی انتخابات کے انعقاد کا حتمی فیصلہ کرتے ہوئے متعلقہ ونگز کو انتخابی شیڈول فوری جاری کرنے کی ہدایت کر دی ہے۔ الیکشن کمیشن نے پنجاب حکومت کی جانب سے اپریل 2027ء میں انتخابات کرانے کی تجویز اور مؤقف کو غیر تسلی بخش قرار دے کر رد کر دیا۔ کمیشن نے پنجاب حکومت کی جانب سے انتخابی افسران (DROs اور ROs) کی فہرستیں نہ دینے پر مایوسی کا اظہار کرتے ہوئے 1 ہفتے کے اندر فہرستیں فراہم کرنے کی ہدایت کی ہے۔ اس کے علاوہ، وزارتِ دفاع کی جانب سے خاطر خواہ جواب نہ ملنے کے باوجود آئینی ذمہ داری کے تحت کنٹونمنٹس میں بھی بلدیاتی انتخابات کا شیڈول فی الفور جاری کرنے کے احکامات دیے گئے ہیں۔