مریم نواز سے آکسفورڈ یونیورسٹی پریس پاکستان کے وفد کی ملاقات، جدید نصاب کے فروغ پر تبادلہ خیال

وزیراعلیٰ پنجاب مریم نواز شریف سے آکسفورڈ یونیورسٹی پریس (OUP) پاکستان کے اعلیٰ سطحی وفد نے ملاقات کی، جس میں صوبے میں تعلیم کا معیار بلند کرنے، اساتذہ کی ڈیجیٹل تربیت اور جدید نصاب کے نفاذ کے لیے باہمی تعاون پر تفصیلی تبادلہ خیال کیا گیا۔

ملاقات کے دوران ’نواز شریف سکول آف ایمیننس‘ میں آکسفورڈ یونیورسٹی پریس کے عالمی نصاب کا پائلٹ پراجیکٹ شروع کرنے کا اہم فیصلہ کیا گیا۔ آکسفورڈ کے وفد نے پنجاب میں تعلیمی اصلاحات کی تعریف کرتے ہوئے اساتذہ کی کیپسٹی بلڈنگ، ڈیجیٹل ٹریننگ اور ٹیچنگ گائیڈز کی تیاری میں حکومت پنجاب کو مکمل معاونت فراہم کرنے کی پیشکش کی جس کا وزیراعلیٰ نے خیرمقدم کیا۔

گفتگو کرتے ہوئے وزیراعلیٰ مریم نواز نے کہا کہ عوام کا سرکاری تعلیمی اداروں پر اعتماد بحال ہو چکا ہے اور نواز شریف سکول آف ایمیننس کے انٹری ٹیسٹ میں ہزاروں بچوں کی شرکت اس کا واضح ثبوت ہے۔ انہوں نے مزید کہا کہ وہ صرف پنجاب ہی نہیں بلکہ سندھ اور کراچی سمیت دیگر صوبوں کے عوام کی تکلیف کو بھی اپنے دل میں محسوس کرتی ہیں اور بلا تفریق خدمت کا عزم رکھتی ہیں۔