سوڈان میں سونے کی کان پر فضائی حملہ، 72 مزدور ہلاک

سوڈان کے شمالی علاقے میں سونے کی ایک کان پر تباہ کن فضائی حملے کے نتیجے میں 72 کان کن مزدور ہلاک ہو گئے ہیں، جبکہ اس حملے کا الزام مصری فضائیہ پر عائد کیا گیا ہے۔ بین الاقوامی خبر رساں ادارے رائٹرز کے مطابق مصری فضائیہ کی اس حملے میں شمولیت کے الزام کی آزادانہ ذرائع سے تصدیق نہیں ہو سکی ہے۔ دوسری جانب سوڈانی فوج اور ریپڈ سپورٹ فورسز (RSF) کے درمیان جاری شدید جنگ کے دوران ڈرون حملوں میں تشویشناک اضافہ ہوا ہے۔ اقوامِ متحدہ کے مطابق ریاست ‘بلیو نائل’ میں بے گھر افراد کے ایک کیمپ پر کیے گئے ڈرون حملے میں مزید 31 افراد جاں بحق ہو گئے ہیں۔ ان مسلسل فضائی حملوں اور خونریز تصادم کے باعث ملک میں انسانی بحران اور عام شہریوں کی ہلاکتوں پر عالمی برادری کی تشویش شدید ہو گئی ہے۔