معروف اینکر اقرار الحسن کو لاہور سے گرفتار کر لیا گیا

معروف ٹی وی اینکر اور ‘پاکستان عوام راج تحریک’ کے سربراہ اقرار الحسن کو لاہور کے علاقے ڈی ایچ اے فیز 8 میں واقع ان کی رہائش گاہ سے رات گئے گرفتار کیے جانے کی اطلاعات سامنے آئی ہیں۔ اقرار الحسن کے اہل خانہ اور ذرائع کے مطابق رات تقریباً 3 بجے سادہ کپڑوں میں ملبوس سیکیورٹی اہلکار ان کے گھر میں داخل ہوئے اور انہیں اپنے ساتھ لے گئے۔

ذرائع کے مطابق چھاپے کے دوران سادہ کپڑوں میں ملبوس اہلکاروں کے ہمراہ خواتین اہلکار بھی موجود تھیں، جن کی یونیفارم اور بیجز پر ‘نیشنل سائبر کرائم انویسٹی گیشن ایجنسی’ (NCCIA) درج تھا۔ نجی نیوز چینل کے اینکر پرسن اور اقرار الحسن کے دیرینہ ساتھی وسیم بادامی نے بھی ایک ویڈیو پیغام کے ذریعے ان کی رہائش گاہ سے گرفتاری کی تصدیق کی ہے اور بتایا کہ سادہ کپڑوں میں ملبوس اہلکار رات گئے انہیں ساتھ لے گئے ہیں۔

واضح رہے کہ اقرار الحسن نجی ٹی وی کے معروف اینکر رہنے کے ساتھ ساتھ سیاسی جماعت ‘پاکستان عوام راج تحریک’ کے سربراہ بھی ہیں۔ تاحال اقرار الحسن کی گرفتاری کی رسمی وجوہات یا ان کے خلاف درج کسی مقدمے کی تفصیلات سامنے نہیں آ سکی ہیں، جبکہ متعلقہ سرکاری حکام یا این سی سی آئی اے کی جانب سے بھی اس گرفتاری سے متعلق باضابطہ تصدیق یا موقف سامنے آنا باقی ہے۔