آئی ٹی ایف ماسٹرز ورلڈ ٹیم چیمپئن شپ، پاکستان نے سلور میڈل اپنے نام کر لیا

پرتگال میں منعقدہ آئی ٹی ایف ماسٹرز ورلڈ ٹیم چیمپئن شپ کے اوور 45 زمرے کے سنسنی خیز فائنل میں پاکستان کو ٹاپ سیڈ سپین کے ہاتھوں ناکامی کا سامنا کرنا پڑا، جس کے بعد قومی ٹیم نے چاندی کا تمغہ (سلور میڈل) اپنے نام کر لیا۔ فائنل میں سنگلز اور ڈبلز مقابلے ایک ایک سے برابر ہونے کے بعد ٹائٹل کا فیصلہ آخری اور حتمی سنگلز میچ پر منتقل ہوا، جہاں سپین کے فرانسسکو مارٹینز بائنا نے پاکستان کے تجربہ کار ٹینس سٹار عقیل خان کو 6-4 اور 6-2 سے ہرا کر اپنی ٹیم کو چیمپئن بنا دیا۔

پاکستانی ٹیم نے فائنل تک کے سفر میں شاندار کارکردگی کا مظاہرہ کرتے ہوئے امریکہ، کینیڈا، سویڈن اور میزبان پرتگال جیسی مضبوط ٹیموں کو شکست دے کر کامیابی سے فائنل میں جگہ بنائی تھی۔ عالمی سطح کی اس چیمپئن شپ میں 30 سے زائد ممالک کے 300 سے زائد کھلاڑیوں نے شرکت کی، اور اس مقابلے میں میڈل جیتنے والا پاکستان پورے ایشیا کا واحد ملک بن گیا ہے۔