پاکستان کا آسیان ممالک کے ساتھ تعاون اور شراکت داری مزید مضبوط بنانے کے عزم کا اعادہ

نائب وزیراعظم اور وزیرِ خارجہ اسحاق ڈار نے جنوب مشرقی ایشیائی ممالک کی تنظیم (آسیان) کے 59ویں یومِ تاسیس کے موقع پر خطے کے ممالک کے ساتھ پاکستان کی دیرینہ دوستی، باہمی تعاؤن اور شراکت داری کو مزید مضبوط بنانے کے پختہ عزم کا اعادہ کیا ہے۔

نائب وزیراعظم نے حکومتِ پاکستان اور عوام کی جانب سے آسیان کے تمام رکن ممالک کی حکومتوں اور عوام کو سالگرہ کی مبارکباد اور نیک خواہشات پیش کیں۔ انہوں نے آسیان کے سیکرٹری جنرل ڈاکٹر کاؤ کم ہورن کو خطے میں علاقائی تعاون، استحکام اور خوشحالی کے فروغ کے لیے ان کی مثالی قیادت پر خراجِ تحسین پیش کیا۔ اسحاق ڈار نے کہا کہ آسیان ڈے جنوب مشرقی ایشیا کی اقوام کے اتحاد اور یکجہتی کی عکاسی کرتا ہے اور پاکستان اس اہم موقع پر اپنے تمام آسیان دوستوں کے ساتھ مکمل اظہارِ یکجہتی کرتا ہے۔

انہوں نے کہا کہ آسیان علاقائی انضمام اور اجتماعی ترقی کا ایک نمایاں نمونہ بن چکا ہے جس نے اقتصادی ترقی، سماجی ہم آہنگی اور سفارتی روابط میں بے مثال کامیابیاں حاصل کی ہیں۔ نائب وزیراعظم کے مطابق پاکستان اور آسیان کے تعلقات باہمی احترام، عدم مداخلت اور تعمیری روابط کے مشترکہ اصولوں پر قائم ہیں، اور پاکستان تجارت، سرمایہ کاری، تعلیم، ثقافت اور عوامی روابط کے شعبوں میں تعاون کو نئی بلندیوں پر لے جانے کے لیے پرعزم ہے۔

اسحاق ڈار نے مزید کہا کہ پاکستان آسیان ریجنل فورم (ARF) میں بھی ایک فعال رکن کے طور پر علاقائی امن و سلامتی کے لیے اپنا کردار ادا کر رہا ہے۔ موجودہ عالمی چیلنجز کے دور میں آسیان کا پرامن تعاون کا عزم قابل تحسین ہے، اور پاکستان ایک مربوط اور خوشحال خطے کے مشترکہ وژن کے حصول کے لیے آسیان کے ساتھ قریبی تعاون جاری رکھے گا۔