مریم نواز کا پنجاب بھر میں صفائی کا جامع مائیکرو پلان تیار کرنے کا حکم

وزیراعلیٰ پنجاب مریم نواز شریف نے صوبہ بھر میں صفائی کے نظام کو مؤثر اور منظم بنانے کے لیے سات روز کے اندر ‘بیٹ سسٹم’ نافذ کرنے اور جامع مائیکرو پلان سمیت ستھرا پنجاب پروگرام کی مکمل پراگریس رپورٹ آئندہ ہفتے پیش کرنے کی ہدایت کر دی ہے۔ وزیراعلیٰ پنجاب کی زیر صدارت اعلیٰ سطح کے اجلاس میں صفائی کی صورتحال، ویسٹ کلیکشن اور ٹرانسپورٹ فلو کا تفصیلی جائزہ لیا گیا۔ مریم نواز شریف نے حکم دیا کہ 50 فیصد سے کم کارکردگی دکھانے والی نجی کمپنیوں کو فوری فارغ کر کے ایک ہفتے میں متبادل سرکاری صفائی آپریشن فعال کیا جائے اور ورکرز کے واجبات کی بروقت ادائیگی یقینی بنائی جائے۔ بریفنگ کے دوران بتایا گیا کہ ہر تحصیل میں اسسٹنٹ کمشنر صفائی کے ذمہ دار ہوں گے جبکہ ورکرز کی نگرانی کے لیے خصوصی ایپ اور اینٹی لٹرنگ سکواڈز فعال کر دیے گئے ہیں۔ اس موقع پر وزیراعلیٰ نے ضلع چکوال میں صفائی کی بہترین صورتحال پر ڈپٹی کمشنر سارہ حیات اور ان کی ٹیم کی کارکردگی کو سراہا۔