پاکستان موسمیاتی آفات کے خلاف رہنما کردار ادا کرسکتا ہے: صدر زرداری

صدر مملکت آصف علی زرداری نے قدرتی آفات کے خطرات میں کمی کے عالمی دن پر اپنے خصوصی پیغام میں کہا ہے کہ پاکستان موسمیاتی تبدیلیوں اور قدرتی آفات سے نمٹنے کی عالمی جدوجہد میں محض ایک متاثرہ ملک نہیں بلکہ رہنما کردار ادا کر سکتا ہے۔ صدر مملکت نے زور دیا کہ آفات کے بعد محض ردعمل دینے کے بجائے پیشگی تیاری اور مؤثر منصوبہ بندی کو قومی و بین الاقوامی سرگرمیوں کا بنیادی جزو بنانا ہوگا۔ انہوں نے کہا کہ مقامی آبادیاں اور مقامی حکومتیں آفات کے خلاف دفاع کی پہلی صف ہیں، اِس لیے انہیں بااختیار اور مضبوط بنانا وقت کی اہم ضرورت ہے۔ صدر زرداری نے سرحد پار قبل از وقت انتباہ (Early Warning System) اور مشترکہ دریاؤں کے تحفظ کے لیے علاقائی و بین الاقوامی تعاون کو وقت کی اہم ضرورت قرار دیتے ہوئے کہا کہ باہمی اشتراک اور بروقت معلومات کے تبادلے سے ہی جانی و مالی نقصانات کو کم سے کم کیا جا سکتا ہے۔