وزیراعظم کی پرائیویٹائزیشن کمیشن کی تنظیمِ نو 01 ماہ میں مکمل کرنے کی ہدایت

وزیراعظم محمد شہباز شریف کی زیرِ صدارت اسلام آباد میں بجلی کی ترسیلی کمپنیوں (DISCOs) کی نجکاری اور پرائیویٹائزیشن کمیشن کی ادارہ جاتی تنظیمِ نو کی پیش رفت پر ایک اعلیٰ سطحی جائزہ اجلاس منعقد ہوا۔ اجلاس کے دوران وزیراعظم نے خصوصی ہدایت جاری کی کہ پرائیویٹائزیشن کمیشن میں جاری اصلاحاتی کام کو 01 ماہ میں مکمل کیا جائے اور عالمی معیار کے مالیاتی، قانونی اور انفارمیشن ٹیکنالوجی کے ماہرین کو کمیشن کی افرادی قوت کا حصہ بنایا جائے۔ بریفنگ کے دوران بتایا گیا کہ ڈسکوز کی نجکاری کے پہلے مرحلے میں شامل گوجرانوالہ الیکٹرک پاور کمپنی (GEPCO)، فیصل آباد الیکٹرک سپلائی کمپنی (FESCO) اور اسلام آباد الیکٹرک سپلائی کمپنی (IESCO) کے لیے ترکیہ، سعودی عرب اور چین میں منعقدہ روڈ شوز کے حوصلہ افزا نتائج حاصل ہوئے ہیں۔ وزیراعظم نے ہدایت کی کہ نجکاری میں صارفین کے مفاد کی تحفظ، شفافیت اور قانونی فریم ورک کی بروقت تکمیل کو یقینی بنایا جائے۔ اس اہم اجلاس میں وفاقی وزراء سردار اویس احمد خان لغاری، احد خان چیمہ، شزا فاطمہ خواجہ، اور وزیراعظم کے مشیر محمد علی سمیت دیگر اعلیٰ حکام نے شرکت کی۔