پاکستان ویمن کی تیسرے ٹی ٹوئنٹی میں کامیابی، سیریز 1-2 سے سری لنکا کے نام

پاکستان ویمن کرکٹ ٹیم نے دمبولہ میں کھیلے گئے تین ٹی ٹوئنٹی میچوں پر مشتمل سیریز کے تیسرے اور آخری میچ میں سری لنکا ویمن ٹیم کو ۴ وکٹوں سے شکست دے دی۔ میچ میں پہلے بیٹنگ کرتے ہوئے میزبان سری لنکا کی ٹیم مقررہ ۲۰ اوورز میں ۶ وکٹوں کے نقصان پر ۱۱۳ رنز ہی بنا سکی۔ جواب میں قومی ویمن ٹیم نے مطلوبہ ہدف ۱۹ویں اوور کی دوسری گیند پر ۶ وکٹوں کے نقصان پر ۱۱۵ رنز بنا کر حاصل کر لیا۔ اگرچہ اس فتح سے پاکستان نے سیریز کا اختتام کامیابی پر کیا، تاہم سری لنکا نے ابتدائی دونوں میچز میں ۶، ۶ وکٹوں سے کامیابی حاصل کر کے سیریز ۲-۱ سے اپنے نام کر لی تھی۔ اس سے قبل کھیلے گئے ون ڈے سیریز میں بھی پاکستان کو پہلے میچ میں کامیابی کے بعد اگلے دونوں میچوں میں شکست کا سامنا کرنا پڑا تھا۔