کراچی: جناح اسپتال میں منشیات کے عادی افراد کی بحالی کیلئے جدید سینٹر کا افتتاح

وزیر صحت سندھ ڈاکٹر عذرا فضل پیچوہو نے جناح اسپتال کراچی میں منشیات کے عادی افراد کی بحالی کے لیے جدید اوپیائیڈ ایگونِسٹ مینٹیننس تھراپی (OAMT) سینٹر کا باقاعدہ افتتاح کر دیا ہے۔ میڈیا سے گفتگو کرتے ہوئے صوبائی وزیر نے بتایا کہ یہ سینٹر ماہر ڈاکٹرز اور تربیت یافتہ عملے کی زیرِ نگرانی مریضوں کو بتدریج نشے سے نجات، طبی کونسلنگ اور مکمل بحالی کی سہولیات فراہم کرے گا۔ انہوں نے ایچ آئی وی (HIV) اسکریننگ کے عمل کو تیز تر بنانے کے عزم کا اعادہ کرتے ہوئے کہا کہ زیادہ سے زیادہ کیسز کو سامنے لا کر بروقت علاج ممکن بنایا جائے گا۔ ایک سوال کے جواب میں ڈاکٹر عذرا پیچوہو نے جناح اسپتال میں غفلت کے باعث مریض کی جان جانے کے واقعے کی شدید مذمت کی اور شفاف انکوائری کر کے ذمہ داران کے خلاف سخت کارروائی کا حکم دیا۔