یمنیٰ زیدی کی ’سرپرائز برتھ ڈے پارٹی‘ کی تصاویر وائرل

پاکستان کی معروف اور ہر دلعزیز اداکارہ یمنیٰ زیدی کی ’سرپرائز برتھ ڈے پارٹی‘ کی خوبصورت تصاویر اور ویڈیوز سوشل میڈیا پر وائرل ہو گئی ہیں، جنہیں مداحوں کی جانب سے بے حد پسند کیا جا رہا ہے۔

فوٹو اور ویڈیو شیئرنگ ایپ انسٹاگرام پر یمنیٰ زیدی نے اپنی سالگرہ کے جشن کی تصاویر شیئر کیں، جن میں وہ اپنے اہلخانہ اور قریبی دوستوں کے ساتھ انتہائی خوشگوار موڈ میں نظر آ رہی ہیں۔ اداکارہ نے اس موقع پر سرپرائز برتھ ڈے پارٹی کا اہتمام کرنے پر اپنے دوستوں کا خصوصی شکریہ ادا کیا۔

اپنی پوسٹ میں جذباتی انداز اپناتے ہوئے اداکارہ نے لکھا، “میری اور میری فیملی کے لیے سرپرائز برتھ ڈے 2026! دنیا بھر کے تمام مداحوں کا دل سے شکریہ جنہوں نے میرے اس دن کو اتنا خاص بنایا۔” انہوں نے مزید لکھا کہ “یہ احساس واقعی بہت خوبصورت ہے کہ آپ کو چاہنے والے اتنے سارے لوگ موجود ہیں۔ یہ خوشی کے آنسو اس بات کی گواہی دیتے ہیں کہ انسان کا دل محبت سے بھرا ہو تو وہ دوسروں کے خلوص کی قدر کرنا جانتا ہے۔”

یمنیٰ زیدی کی اس پوسٹ پر جہاں دنیا بھر سے ان کے مداح مبارکباد کے پیغامات بھیج رہے ہیں، وہیں شوبز انڈسٹری کی نامور شخصیات بھی پیش پیش ہیں۔ معروف اداکارہ حرا مانی نے انہیں سالگرہ کی مبارکباد دی جبکہ سینئر اداکارہ بشریٰ انصاری نے محبت بھرا پیغام دیتے ہوئے لکھا کہ “صدا سلامت اور خوش رہو۔” واضح رہے کہ یمنیٰ زیدی پاکستان کی صفِ اول کی اداکارہ ہیں جو متعدد مقبول اور یادگار ڈراموں میں اپنی بہترین اداکاری کے جوہر دکھا چکی ہیں۔