غزہ کی اسلامی یونیورسٹی پر اسرائیلی حملہ، 3 افراد جاں بحق، 8 زخمی

غزہ شہر میں واقع اسلامی یونیورسٹی پر اسرائیلی ڈرون حملے کے نتیجے میں 3 افراد جاں بحق اور 8 زخمی ہو گئے ہیں۔ غیر ملکی خبر رساں ادارے کے مطابق حملہ اتوار کے روز اس وقت ہوا جب یونیورسٹی میں تدریسی عمل جاری تھا، جہاں جاں بحق ہونے والوں میں انتظامی عملے کے دو ارکان جبکہ زخمیوں میں طلبہ شامل ہیں۔ غزہ کی وزارتِ تعلیم نے واقعے کی شدید مذمت کرتے ہوئے بتایا کہ مسلسل بمباری سے اعلیٰ تعلیمی شعبے کی 95 فیصد عمارتیں تباہ ہو چکی ہیں اور گزشتہ چھ دنوں میں 10 طلبہ و اساتذہ بھی جاں بحق ہوئے ہیں۔ سول ڈیفنس کے مطابق غزہ کے دیگر علاقوں میں بھی اتوار کو مزید چار افراد جاں بحق ہوئے، جبکہ اسرائیلی فوج نے واقعے کی رپورٹس کے جائزہ لینے کا مؤقف دیا ہے۔