بڑے باپ کا بیٹا ہونے کے باوجود مشکلات کا سامنا رہا، عارف لوہار

بین الاقوامی شہرت یافتہ معروف پاکستانی فوک سنگر عارف لوہار نے انکشاف کیا ہے کہ عالم لوہار جیسے عظیم گلوکار کا بیٹا ہونے کے باوجود انہیں کیریئر کے ابتدائی دنوں میں شدید مشکلات کا سامنا کرنا پڑا۔ کراچی دورے کے موقع پر میڈیا سے گفتگو کرتے ہوئے انہوں نے بتایا کہ وہ تقریباً 13 سال تک پاکستان ٹیلی ویژن (PTV) کے گیٹ کے باہر کھڑے رہے اور سخت محنت و میرٹ کی بنیاد پر اپنا مقام بنایا۔ عارف لوہار کا کہنا تھا کہ آج کی نئی نسل کو جدید سہولیات اور آسانیاں میسر ہیں جبکہ انہوں نے بطور چائلڈ اسٹار بے شمار سختیاں دیکھیں۔ انہوں نے کہا کہ چمٹا اور ‘جگنی’ دنیا بھر میں ان کی پہچان ہے اور ان کی موسیقی کی روح پاکستان سے محبت سے سرشار ہے۔ کئی برس بعد کراچی آمد پر خوشی کا اظہار کرتے ہوئے انہوں نے برنس روڈ کے روایتی کھانوں اور اپنے مداحوں کی محبت کو بے حد سراہا۔