رواں سال کاروباری سرگرمیوں کے فروغ اور ترقی کا سال ہوگا: وزیراعظم

وزیراعظم محمد شہباز شریف کی زیرِ صدارت ایف بی آر (FBR) اصلاحات پر ایک اہم جائزہ اجلاس منعقد ہوا، جس میں ٹیکس نظام میں جاری بہتری اور معاشی استحکام پر تفصیلی بریفنگ دی گئی۔ اجلاس سے خطاب کرتے ہوئے وزیراعظم نے کہا کہ پاکستان کی معیشت اب استحکام کی راہ پر گامزن ہے اور رواں سال معاشی ترقی و کاروباری سرگرمیوں کے فروغ کا سال ہوگا۔ انہوں نے کاروباری برادری کو معیشت کی ریڑھ کی ہڈی قرار دیتے ہوئے ایف بی آر کے سینئر افسران کو ہدایت کی کہ وہ ہر ماہ کے پہلے ہفتے کراچی کا دورہ کر کے تاجروں کے جائز مسائل کو ترجیحی بنیادوں پر حل کریں۔ وزیراعظم نے اعلان کیا کہ ٹیکس قوانین پر سختی سے عمل کرنے والی کمپنیوں کی سرکاری سطح پر حوصلہ افزائی کی جائے گی۔ اجلاس کو بریفنگ کے دوران بتایا گیا کہ شوگر، سیمنٹ، ٹوبیکو، ٹائلز اور فرٹیلائزرز کی صنعتوں میں پروڈکشن مانیٹرنگ سسٹم کامیابی سے نصب ہو چکا ہے، جبکہ ٹیکسٹائل اور مشروبات کے شعبوں میں یہ کام جاری ہے۔ مانیٹرنگ سسٹم کی بدولت گزشتہ ایک سال کے دوران شوگر انڈسٹری سے 42 بلین روپے، سیمنٹ سے 38 بلین روپے اور بیوریجز انڈسٹری سے 15 بلین روپے کا اضافی ٹیکس حاصل ہوا ہے۔ اجلاس میں وفاقی وزراء محمد اورنگزیب، اعظم نذیر تارڑ، احد خان چیمہ، عطاء اللہ تارڑ، شزا فاطمہ، گورنر اسٹیٹ بینک جمیل احمد اور دیگر اعلیٰ حکام نے شرکت کی۔