شہدأ کی توہین ناقابل برداشت ہے، فوجی جوانوں اور اہلخانہ سے معذرت کرتا ہوں، طاہر اشرفی

قومی پیغامِ امن کمیٹی کے کوآرڈینیٹر مولانا حافظ طاہر محمود اشرفی نے واضح کیا ہے کہ شہدائے وطن کی توہین کسی بھی صورت برداشت نہیں کی جائے گی، وہ فوجی جوانوں اور شہدا کے اہل خانہ سے معذرت خواہ ہیں۔ کراچی میں وزیرِ اعلیٰ سندھ سید مراد علی شاہ کے ہمراہ پریس کانفرنس کرتے ہوئے انہوں نے کہا کہ پاک فوج کے جوان چند ہزار روپے تنخواہ کے لیے نہیں بلکہ وطن کے دفاع کے لیے سرحدوں پر جانیں قربان کر رہے ہیں اور سیاست دانوں کو اپنے سیاسی اختلافات کے لیے اداروں کو نشانہ بنانے سے گریز کرنا چاہیے۔ انہوں نے فتنۃ الخوارج اور دیگر دشمن عناصر کے خلاف قومی یکجہتی پر زور دیا۔ اس سے قبل، مولانا طاہر اشرفی کی قیادت میں کمیٹی کے اعلیٰ سطحی وفد نے وزیرِ اعلیٰ سندھ مراد علی شاہ سے ملاقات کی، جس میں سینیئر صوبائی وزراء، چیف سیکریٹری اور عسکری و پولیس حکام نے شرکت کی۔ اس موقع پر وزیرِ اعلیٰ سندھ نے بین المذاہب ہم آہنگی اور رواداری کے فروغ کے لیے کمیٹی کے کردار کو سراہتے ہوئے سندھ حکومت کی جانب سے مکمل تعاون کا یقین دلایا۔