کراچی میں مزید دو بچیوں میں ایچ آئی وی کی تصدیق ہو گئی

کراچی کے ولیکا ہسپتال سے سامنے آنے والے ایچ آئی وی (HIV) کیسز کا تشویشناک سلسلہ تھم نہ سکا، جہاں ہسپتال انتظامیہ کی مبینہ غفلت کے باعث مزید دو معصوم بچیوں میں ایچ آئی وی وائرس کی تصدیق ہو گئی ہے۔ ذرائع کے مطابق، وائرس سے متاثر ہونے والوں میں ضیا کالونی کی 9 سالہ اور میٹروول کی 3 سالہ بچی شامل ہے۔ متاثرہ بچی کے والد نے ہسپتال پر سنگین الزام عائد کرتے ہوئے بتایا کہ ان کی بیٹی سینے کے انفیکشن (Chest Infection) کے علاج کے لیے ولیکا ہسپتال میں زیرِ علاج رہی تھی، تاہم ڈسچارج ہونے کے بعد بھی طبیعت مسلسل خراب رہنے پر جب نجی لیب سے خون کے ٹیسٹ کروائے گئے تو رپورٹ میں ایچ آئی وی پازیٹو ہونے کا انکشاف ہوا۔ اس لرزہ خیز واقعے کے سامنے آنے کے بعد متاثرہ خاندانوں میں شدید غم و غصہ پایا جا رہا ہے، جبکہ محکمہ صحت کے حکام کی جانب سے ہسپتال میں استعمال ہونے والی سرنجز، بلڈ ٹرانسفیوژن کے طریقہ کار اور دیگر طبی آلات کی مزید تحقیقات اور متاثرہ بچوں کے طبی معائنے کا عمل شروع کر دیا گیا ہے۔