ظہران ممدانی امریکی یہودیوں میں نیتن یاہو سے زیادہ مقبول قرار

وائٹ ہاؤس کے سابق اعلیٰ عہدیدار اہم ایمانوئل نے ایک چونکا دینے والے بیان میں ظہران ممدانی کو امریکی یہودیوں میں اسرائیلی وزیر اعظم بینجمن نیتن یاہو سے زیادہ مقبول قرار دے دیا ہے۔ اسرائیلی میڈیا کو دیے گئے ایک انٹرویو میں اہم ایمانوئل نے نیتن یاہو کی حکومت کو سخت تنقید کا نشانہ بناتے ہوئے کہا کہ انہوں نے جس انداز سے اسرائیل کی قومی سلامتی کو چلایا ہے، اس نے ملک کو ایک بند گلی میں پہنچا دیا ہے۔ انہوں نے خبردار کیا کہ نیتن یاہو کی موجودہ پالیسیوں نے امریکہ کے ساتھ اسرائیل کے روایتی اور سٹریٹجک اتحاد کو ایک انتہائی نازک موڑ پر لا کھڑا کیا ہے، جس کی وجہ سے اسرائیل نے امریکہ اور یورپ دونوں کی ہمدردیاں کھو دی ہیں۔

ان کا مزید کہنا تھا کہ آج اسرائیل عالمی سطح پر ایک تنہا ریاست بن چکا ہے اور نیتن یاہو کی حکومت نے ایک ایسا نقصان دہ سودا کیا ہے جس کے نتیجے میں اسرائیل نے اپنی بڑی معاشی مارکیٹیں بھی گنوا دی ہیں۔